“Politikanhong kasibot” epektibo 

sa malampusong rabies program 

Rey Anthony Chiu 

TAGBILARAN CITY, Bohol, Pebrero 1, (PIA) – Ang kalampusan sa usa ka programa nagsandig sa lig-ng politikanhong baruganan sa mga namunuan ug sa mga tigpatuman niini. 

Kini maoy nakuha nga pagtulon-an sa mga sakop sa Bohol Rabies Team nga mihimo ug benchmarking Tour sa Syudad sa Marikina City; usa ka dapit nga giila nga may labing lig-ong programa batok sa rabies ug maayong pagpamuhi og hayopan. 

Sa usa ka pagpadayag nga gihimo ni Dr. Manuel Carlos, iyang gitumbok nga ang napanday nga ordinansa sa rabies ug sa nahiusang panglantaw sa mga pamunuan sa lungsod maoy labing maayong factor aron modagan og mayo ang local nga programa. 

Subay sa balaod, gipatuman sa Buhatan sa City Veterinarian ang programa sa pagpangrehistro, pagpanghikot ug sa husto nga pag-atiman sa mga hayopan. 

Ug dala sa way pagkiling sa mga pangulo ug sa paggpatuman gayud sa politikanhong kasibut, lisud nga ikakita sa kadalanan sa lungsod ang saag ug layaw nga iro. 

Segun sa ordinansa, gawas sa tinuig nga schedule sa pagpangbakuna, matag adlaw magpatroya ang mga tawo gikan sa buhatan aron manakop og irong saag. 

May mga tabang usab sa katawhan nga giisip nga labing maayo ilabi na sa pagtanyag og mga hulagway nga prueba sa pagsupak sa balaod. 

Sa Marikina, dili na halos makadakop ang mga roving teams sa Office of the City Veterinarian (OCV) tungod kay nasayud na ang halos tanan sa dangatan kon padayon ang hulga sa rabies. 

Apan inay dakpon ang iro, sundon hinuon kini hangtud nga ma-uli, ug matultolan ang mga tinugyanan sa pag-issue og citation tickets alang sa paglabag sa ordinansa. 

Kini nga stratehiya nakapa-agahat usab sa benerinaryo sa Bohol nga mahimong sagopon aron ikapatuman usab sa Bohol. 

Hinuon, buot ni Lapiz nga tun-an una ang mga palisiya ilabi na ka yang Bohol nakadaug na sa Gawad Galing Pook sa programang rabies. 

Dinhi sa Bohol, ang programa sa rabies gisagop sa halos tanan nga mga munisipyo ug gipatuman og mas maayo sa level sa mga kabarangayan. 

Apan magkanihit ang programa kon walay tukmang suporta gikan sa katawhan ug sa mga liber, buytag ni Lapiz. (30)

==========

Chatto mimandu paghashas 

Na daan sa isasalmot sa GP 

Rey Anthony Chiu 

TAGBILARAN CITY, Bohol, Pebrero 1, (PIA) -- Aron padayong molungtad ang mga programa sa Bohol ngadto sa Galing Pook, karon ka sayo, gimandu na ni Gob. Edgar Chatto nagdto sa mga tinugyanan sa paghimo og una-una nga paghashas sa mga labing maayong programa sa matag buhatan. 

Kinio aron mas sayon na sa Bohol ang pagpackage sa mga programa nga isalmot alang sa sunod tuig nga Gawad Galing Pook (GGP). 

Kasagaran nga LGU nga naglisud sa pagdaug sa GGP kadtong wala makaandam sa ilang pagbuhat og mga dokumento nga mopamatuod sa kamaayo sa ilang mga proyekto, segun sa mga nakasaksi sa screening. 

Tungod niini, buot sa gobernador nga kon may isalmot man ang Bohol, kini tabangan sa kadaghanan aron seguradong kompleto ang mga basehanan aron mas daku ang kahigayonan sa pagdaug. 

Sukad sa unang pagka-angkon sa Bohol sa GGP diin nakuha niini ang tulo gilayon ka pasidungog, wala na mausbi pa nga daghan ang ganti nga nakuha sa lalawigan. 

Hinuon, mipadayag usab ang Gobernador nga hayan hingusgan sa Bohol ang Purok Movement aron ugmaron ug mahimong usa sa mga posibleng isalmot sa bangga sa labing maayong programa sa sunod tuig. 

Ang Life Helps nga programa usab sa Provincial veterinarian mahimong usa ka maayong isalmot ilabi na kay nakuha na sa buhatan ang duha ka GGP sa Barangay Livestock Aides ug sa Rabies ning tuiga. 

Gitan-aw na usab ang programang Tarsier 117 isip maayong tubag sa mga katalagman ug sa pagtabang sa mga disgrasya, samtang ang Bohol District Jail, usa usab sa mga gitan-aw nga maayong igsasalmot. 

Gawas niini, gilibkas usab ni Chatto atul sa usa ka pagpakighinabi sa telebisyon ang kamaayo sa programang HEAT Caravan, nga possible usab nga iduso sa bangga. (30)

===========

Bohol mipaila sa kahawod 

2 sa 10 ka pasidungog sa 

Galing Pook, kuha sa Bohol 

TAGBILARAN CITY, Bohol, Feb 1, (PIA) –Gipa-ila sa Bohol ang iyang ka hawod sa mga kabag-ohan sa pagpangalagad sa kagamhanan dihang iyang gisakmit ang duha sa napulo ka labing maayong programa sa governance ning tuig. 

Sa usa ka tinuig nga bangga sa labing maayong mga programa sa governance subay sa Galing Pook Awards, gi-angkon sa Bohol Rabies Prevention and Elimination program ug ang Local Government Unit-led Cadastral Survey sa Maribojoc ang duha sa napulo ka lugar nga gitagana alang sa mga maayong LGUs sa nasud ning tuig. 

Mismong si Presidente Benigno Simeon Aquino III ang mitunol sa pasidungog sa Bohol ug sa mga tinugyanan sa lungsod sa Maribojoc atul sa usa ka seremonyas didto sa Rizal Hall sa Malakanyang Enero 30. 

Si Gobernador Edgar Chatto uban sa napulog duha ka delegado sa Bohol maoy midawat sa pasidungog ug miambit sa dungog nga ikauban ang Presidente sa pagpahulagway. 

Sa laing bahin, si Mayor Leoncio Evasco Jr, mao usab ang nanguna sa delegasyon sa lungsod sa Marobojoc diin halos tanan sakop sa hunta municipal miuban aron sa pagdawat sa pasidungog. 

Matud sa mga tigpasiugda, mikabat sa dul-an sa duha ka gatus ka mga programa sa tibuok nasud ang gisalmot sa Galing pook ug ang diin upak ka mananaug niini gikan sa Kabisay-an. 

Uban sa Bohol nga midaug mao ang Limasawa sa Southern Leyte (pagsumpo sa malnutrisyon) ug Alimodian sa Ilo-ilo diin sikat nga proyekto ang pagpaduol sa mga tunghaan sa mga katawhan. 

Duha ang mananaug nga gikan sa Luzon: ang pagkab-ot sa mga tumong sa Millenium Development Goals sa Albay u gang pagtaukod og programa alang sa Mental Health sa Real, Infanta, General Nakar ug Panukulan sa Quezon. 

Midaug usab ang Justice on Wheels sa Sarangani, ang Pagpa-gahum sa mga Subanen sa Zamboanga del Norte, ang proyekto sa kalinaw sa Misamis Oriental ug ang Rural Community e-center sa Upi Magundanao. 

Sa iyang pakigpulong, gidasonan ni Presidente Aquino ang bililhong gimbuhaton sa mga LGu isip katambayayong sa nasudnong kagamhanan sa pagpa-abot sa mga programa nagdto sa kina-uyokang bahin sa nasud. (30)